Zec 3 | NdeIBE | STEP | Yase ingitshengisa uJoshuwa umphristi omkhulu emi phambi kwengilosi kaJehova, loSathane emi kwesokunene sakhe emmangalela.

Zechariah 3

Izambatho Ezihlanzekileyo ZomPhristi Omkhulu

1 Yase ingitshengisa uJoshuwa umphristi omkhulu emi phambi kwengilosi kaJehova, loSathane emi kwesokunene sakhe emmangalela. 2 UJehova wathi kuSathane, “UJehova uyakukhuza, Sathane! UJehova oyikhethileyo iJerusalema, uyakukhuza! Umuntu lo kasisikhuni esihwatshwe sibhebha na?”

3 UJoshuwa wema phambi kwengilosi egqoke ezitshutshumayo ngokungcola. 4 Ingilosi yasisithi kulabo ababemi phambi kwayo, “Mkhululeni izigqoko lezi ezingcolileyo.” Yasisithi kuJoshuwa, “Uyabona, sengisisusile isono sakho, yikho sengizakugqokisa izigqoko ezinhle kakhulu.”

5 Ngasengisithi, “Mthwaliseni iqhiye ehlanzekileyo ekhanda lakhe.” Basebemthwalisa iqhiye ehlanzekileyo ekhanda, bamgqokisa njalo, ingilosi kaJehova ilokhu imi khonapho.

6 Ingilosi yasimupha umlayo lo uJoshuwa, yathi: 7 “Nanku akutshoyo uJehova uSomandla: ‘Uma uzahamba ngezindlela zami ugcine izimiso zami, lapho-ke uzabusa indlu yami, uwaphathe lamaguma ami, njalo mina ngizakupha indawo phakathi kwalaba abemiyo lapha.

8 “ ‘Lalela, wena mphristi omkhulu Joshuwa, kanye labakhula bakho abahlezi phambi kwakho, abangamadoda ayisitshengiselo sezinto ezizayo: Ngizaletha inceku yami iHlumela. 9 Uyabona, ilitshe engilimise phambi kukaJoshuwa! Kulamehlo ayisikhombisa phezu kwelitshe lilinye, njalo ngizagubha umbhalo kulo,’ kutsho uJehova uSomandla, ‘njalo ngizasisusa isono salelilizwe ngelanga elilodwa zwi.

10 “ ‘Ngalelolanga lowo lalowo wenu uzamema umakhelwane wakhe ukuthi ahlale ngaphansi kwevini lomkhiwa wakhe,’ kutsho uJehova uSomandla.”